(1880s-1920s) Sabelina Villar

link

Nin hai en cielo estrelles, ni en campu flores
ni en clavel repiquinos nin agolores,
si mecida con ellos nun tuviés ella,
¡ánxel d'amores,
manoyín de primores,
clavel y estrella!
Porque, siendo tan guapa como enteresa
el llibru que yo tengo sobre la mesa
prúyeme deci-y sele... sele a Acevéu:
-Neña como ésa
debiés ser la princesa
del Deva al Eu.
Porque algaría, lixera, dolce y galana
enchipa d´allegría tuda la plana:
paez que ta diciendo:-Mia qué ti digo:
dexa l´Habana:
¡ ven pa la mio quintana
riír conmigo!
Y cuando rií o llora, pizca o abraza
tien de la nuestra xente tuda la traza,
y lluce como tuda la nuestra xente
isa rapaza
el sellu de la raza
fincáu na frente.
¡ Ai Dios ! non te conozco, neña fermosa,
que miyor que Sabela debiés ser Rosa;
nin tengas tú coscoyu por conoceme,
xentil gayosa,
no axenciarás gran cosa
por querer veme.
Pero prúyemi agora que te to viendo
el dunviati les coples que vo faciendo
y al poner puntu nelles, xana querida,
quedo pidiendo
que puedas tar riendo
muncho na vida.
Y qué menos si al vete cola pradera
retratada tan finsa so la campera
paeces una xana qu´espaya llumes,
¡ais! de xilguera
rises de fechicera,
besos d´arumes.